رسالة الى طلبة الكليات والمعاهد العملية

السلام عليكم ورحمة الله
🙂

من يومين تلاتة كدا ، حصل معايا موقف معين

وكان رد فعلي على الموقف دا

هو رسالة صغننة مني لكل طالب لسه بيدرس او خلص الكلية بتاعته ودخل معهد علشان يتعلم
ويعوض السنين اللي ضيعها في الكلية ، ويقلل الفجوة اللي بينه وبين سوق العمل

حبيت انقلها هنا علشان نفضل فاكرينها وانا افضل فاكر الموقف دا
طول عمري
🙂

اعزائي طلبة الكليات العملية والمعاهد اللي بتدرس نفس المواد بتاعت الكليات العملية: معدش وقت ان حد يحفظنا المادة ويدينا الكورس بالمعلقة !

انت اذا مشتغلتش بإيدك وفضلت تسأل وتتلكك .. منتش نافع! وهتطلع برضه تدور على كورسات وبدل ما كنت بتاخد فلوس وتتعلم ، هتدفع فلوس بعد كدا علشان تتعلم
ويمكن تقعد في البيت كمان لان محدش هيرضى يشغل واحد مبيعرفش يدخل باسورد الويرلس على ابنتو او يفتح ماي سكول داتابيز من ال
phpmyadmin !

كلنا كنا كدا في اﻻول : بس في فرق بين واحد عايز يتعلم ويشتغل ويتبهدل ويتمرمط علشان يطلع حاجة كويسة ،،،،، وواحد تاني مش عارف هو عايز ايه اصلا ! ومفكر انه كويس علشان بيتعلم وبياخد كام ربع جنيه كل شهر وانه لو قال يا شغل هيلاقي الف بيجروا وراه
…..

واحب اقول للنوع التاني دا : ” انسواااااا ”

وهتلف اﻻيام وهنشوف مين فينا اللي صح !

الحقيقة او الصراحة دايما مؤلمة ، واحنا بنحب اللي يقعد يخدعنا ويقولنا الحياة لونها بمبي
لكن الحياة مش كدا … ومجالنا دا برضه مش كدا

عمر ما كان قعدتك قدام واحد بيأكلك ويشربك هتعلمك ازاي تاكل وتشرب لوحدك … خد السنارة يا حبيبي وانزل اصطاد … قولي علمني ازاي اصطاد !!
مش تقوله والنبي انا عايز اعرف ايه الفرق بين السمك البوري والسمك البلطي والجمبري دا سمك ولا بطاطس !
وحياااااااااااات اغلى حاجة عندك انت “مش عندي انا” … عمرك ما هتنفع لو مشيت بمبدأ وكلني دلوقتي وشربني بالمعلقة ، وبكرة هبقى اروح ادور على حد يعلمني اصطاد !

للمرة التانية : انسسسسسسسسىىىىىى يا عمرو

اللي عنده اعتراض يتفضل يقول وجهة نطره !

للي يحب يشوف ردود الناس على البوست دي ممكن يشوفها
هنا

Leave a Reply

Your email address will not be published. Required fields are marked *